نصائح لدخول الجيش – اول ايام الجيش


الفترة الحالية فترة دخول الجيش لاصحابنا وحبايبنا وكل سنة وانتوا طيبين واهلا في الجيش والقوات المسلحة
النصايح دي حاجة مهمة جدا تقدروا تاخدوها معاكم في فترة التدريب في 45 يوم تقريبا , وربنا يقدركوا على دخول الجيش واول ايام الجيش وبالهنا والشفا 🙂

نصائح دخول الجيش اول ايام ايام التدريب في الجيش

نصائح دخول الجيش اول ايام التدريب

1- الفلوس لازم تكون مش اقل من 600 جنيه وزود براحتك زي ما انت عاوز – بس حافظ عليهم كويس بقي – هههه
2- ادوية للبرد – السخونية – مسكن – الكحة – الامساك – الاسهال – الزور -الصداع كلي نصفي – مش مهم نصفي اوي يعني- مرهم للكدمات – بودرة تسلخات – مرهم تسلخات
3- 3 اقفال كومبيوتر عشان ميتكسروش ويتاخد ال 600 جنيه اللى حيلتك و يكونوا حجم متوسط بلاش الكبير عشان مش هينفع
4- غيارات داخلية
5- بودرة رجلين
6- مزيل عرق – عشان هما يشموا ريحتك الحلوة وانت تشم عرقهم هههه
7- فرش جزمة طبي هتلاقيه ب 10 جنيه تقريبا من عند اي خياط جزم عشان البيادة ناشفة هيفيدك يعني
8- مكن حلاقة علي قد ما ربنا يديك هتحلق مرة كل يومين لو دقنك خفيفة و لو تقيلة كل يوم
9- يستحسن لو فووم حلاقة او جيل عشان تنجز بدل كريم الحلاقة و الفرشة و هات افتر شيف – اي حاجة بتستخدمها بعد الحلاقة – عشان الاتهابات من كتر الحلاقة
10- فرشة سنان و لو مش بتغسل سنانك هتغسل في الجيش بدل ما تعفن
11- معجون اسنان بقي بدل نضفت وجبت فرشة اسنان
12- معلقة و دي حاجة مهمة جدا زيها زي ال 600 جنيه ويمكن اكتر عشان الاكل و دايما حافظ عليها و سيبها في جيب الافارول – دا اسم لبس الجيش يا معلم – عشان متنسهاش لو دخلت الميس (المكان اللي بتاكلوا فيه) من غيرها هتضطر يا تقوم يا تاكل بالكارنيه ( والحالتين حاجة بنت ستين في سبعين يعني )
13- خرطوم متر عشان الحمام بس لو عايز الاحسن لان احيانا بيمنعو دخول الخراطيم في شطافة بتتباع عشان الناس اللي بتسافر اسمها فريش باز سعرها 110 جنيه موجودة في الصيدليات الكبيرة زي العزبي هتنفعك خصوصا لما تكون المية مقطوعة و دا العادي يعني بس خليها دايما مليانة و خلي معاك ازازة مية شايلها للاستخدام في الحمام في دولابك و متقلقش محدش هيقول عليك فرفوور – ولا حد قال ماليش فيه 🙂 – لان في الاغلب هيفكروها زمزمية
14- ليفة عشان تستحمي
15- صابون و صبانة بغطا و شامبو اكياس عشان تستخدم مرة و ترمي
16- فوطة و سيبك من الفوطة اللي هيسلموهالك
17- 3 اربطة جزمة بيج عشان لو رباط البيادة اتقطع ما تتسوحش هناك
18- ممكن تاخد معلبات بس مش كتير و ممنوع تماما الاكل العادي طالما مفيش عليه صلاحية مش هيدخل
19- هتحتاج يبقي معاك سندوتشات كتير عشان يوم الترحيل طويل تقريبا اطول يوم ف جيشك وما تبقاش تدي لحد من سندوتشاتك
20- شريحة خط موبايل و تكون مشحونة عشان لو عرفت تسلك نفسك و تقفش موبايل من عسكري قديم تتكلم منه لو معرفتش بيبقي في كباين يتليفونات و بيتباع كروت شحن بتاعت مرحبا بس احتياطي تقدر تشتريه من اي سنترال المصرية للاتصالات بيبقي ب 10 جنيه
21- ممكن تاخد معاك موبايل صغير من غير كاميرا تخليه معاك بحيث لما تترحل تطمن اهلك بس اول ما تترحل مركز التدريب و يقولوا اللي معاه موبايل يسلمه في الامانات سلمه وما تعملش فتك عشان لو اتقفش منك في التفتيش هيتكسر قدامك ,,
22- لما تيجي تحلق احلق علي 1 او نص مش اقل عشان متبقاش زي المساجين ولا تسيبه طويل سيكا عشان متضطرش تحلق في الجيش بالمكنة بتاعتهم
23 – اكياس اريال الصغيرة عشان هتغسل بأديك هناك
24 – قصافة عشان ما تاخدش من حد عشان لو حد اداك قصافة اكيد لفت ع الجيش كله
25- وايبس و ديتول – ودي مش شتيمة دي مناديل مبللة او اي مناديل عادية ياعم وديتول دا منظف ومطهر تطهر بيه ايدك او وشك
26- كشاف صغير عشان الدنيا بتبقي ضلمة بليل في العنبر بيتباع ب 2.5 في المكتبات عشان الناس الى بتكره الضلمة وعشان تتكيف بس اول كام يوم كدا مش لازم تدخلها مضلمة اوي يعني
27- ساعة تكون بتنور بردو عشان كل حاجة هناك بمواعيد
28- شرابات و نصيحة بلاش تلبس الشراب الميري ولا يوم و الاحسن لو شراب كوتينيل تقيل و طويل عشان رجلك متتعورش في البيادة
29- شبشب و يفضل يكون مقفول من الجناب عشان لو الحمامات فيها مية ع الارضية ولا حاجة رجلك ما تتبهدلش ولا تتقرف
30- دوبارة تعلق فيها المفاتيح عشان هيدوك سلسلة بتجيب تنيا مع العرق فتحط المفاتيح في دوبارة احسن – والدوبارة دي خيط عريض كده يتسحمل –
31- محفظة بسوستة تشيل فيها حاجتك و خليها دايما معاك في جيبك و متعرفش حد انت واخد معاك فلوس قد ايه
32- مراية صغيرة عشان لو الحمامات زحمة تعرف تحلق دقنك ..بس خلي بالك ساعات مبيدخلوهاش عالبوابة فحاول تسلكها
33- لما هتدخل هتعرف مصطلحات جديدة زي ميس و كحوول و جيشك حلبة و مستجد و رديف و جراية و زريير و سيكا و اخر واحدة دي الاسم اللي بيطلع علي اي حد اجازاته مستريحة فمتخدش ف بالك
34- قبل ما تروح هتبقي واخد فكرة ان كل الناس اللي هتقابلهم حرامية و كله بياكل في بعضه دي مش حقيقة بس بردو تاخد احتياطك و اوعي تسيب حاجتك برة دولابك
35- هتقابل ناس جدعة جدا و من كل حتة و هتبقوا صحاب بدون مصلحة و انتوا ف مركز التدريب فبلاش تاخد جنب و متعرفش حد بس بردو اختار اللي تقعد معاهم و خلي المقياس الوحيد الرجولة مش دا منين و دا مؤهل ايه , محدش هينفعك غير الناس الجدعة مش مؤهل حد
36- بلاش تشيل كذا شنطة و انت رايح مركز التدريب عشان هتبقي مش عارف تشيلهم ولا تشيل المخلة ولا تشيل البطاطين خليهم جوا بعض كلهم او شنطة كبيرة شوية
37- لو داخل الجيش في الشتا ابقي هات معاك دفاية تحطها تحت البطاطين بتاعة الجيش عشان البطاطين مبتدفيش لوحدها
38 – هتلاقي دايما في حكاية ان في جن و عفاريت ف العنبر و الحمامات كبر دماغك دي حكايات
39- علاقتك بالتونة و الجبنة هتبقي علاقة مش هتتكرر بعد متخرج من الجيش فحاول تحبهم لو مبتحبهمش
40- البس حاجة مريحة و انت رايح يوم الترحيل عشان هتقعد كتير و حافظ عليها عشان لو نزلت اجازة في مركز التدريب
41- ابقي ادخل الحمام بليل عشان مفيش وقت الصبح و هتلاقيه زحمة
42- لو كباين التليفون علي طول عليها ناس و مش عارف تتكلم استني لما كلو ينام و اصحي الساعة 1 او 2 و اتصل براحتك
43- اما تروح وحدتك الاساسية اول حاجة تعملها تسأل العساكر القديمة عن كل حاجة ماشية ازاي في المكان بتاعك عشان تبقي عارف تعمل ايه
44- لو بتعرف كومبيوتر اول ما تروح دور علي العساكر بتوع الكومبيوتر و اتصاحب عليهم عشان ياخدوك معاك المكتب لان المكاتب اريح مكان في الجيش
45- و انت ف مركز التدريب بييجي مناديب من الاسلحة ياخدوا ناس ابعد تماما عن بتوع الصاعقة و المظلات و القوات الخاصة قولهم انك مكسح
46- نصيحة بقي للي لسة هيقدم و لسة مراحش كشف طبي لو طلعت بعد الكشف الطبي مكان اسمه الانتقاء و التوجيه هيسألوك انت فيك حاجة قولهم اي حاجة عشان مياخدوكش عشان دول بيودوا علي حرس حدود و صاعقة و قوات خاصة علي طول
47- لو عندك شكوي طبية حقيقية متفقدش الامل و متتكسفش عشان في ناس بتطلع ف افضل اعمل تظلم و متكسلش
48- متخليش اي حد يضايقك ف مركز تدريب لان دوسيهك بيكون مقفول .. و بتتحاسب اول ما تروح القوة الاساسية بس
49- لو انت بتدخن خد معاك 3 ولاعات و كمرهم عشان الولاعه هناك حاجة نادرة و غير كدا لو اتشافت بتتكسر و مش اكتر من 4 علب سجاير عشان الباقي هيتاخد


شارك
Share

اضف رد

لن يتم نشر البريد الإلكتروني . الحقول المطلوبة مشار لها بـ *

*

Time limit is exhausted. Please reload CAPTCHA.