قصيدة مدح في مصر جميله اوى

دى قصيده مدح فى مصر ام الدنيا اقروها واللى يحس انها فيها حاجه مش صح او فيها مبالغه يقول , شعر عن مصر

شعور سخيف
إنك تحس بإن وطنك شيء ضعيف
صوتك ضعيف
رأيك ضعيف

إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف

سألوا جحا عن سر ضحكه
قالك أصل اتنين وشبكو
اللى كان من تحت ميت
واللى كان من فوق كفيف

دا شعور سخيف
وشعور سخيف
إنك تكون رمز الشحاتة
تبنى مبنى للشحاتة
تعمل وزراة للشحاتة

يا ساقية دورى … عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت

أنا اللى صاحب البيت
عايش بدون لازمة
ولما مرة شكيت
إدونى بالجزمة

أنا اللى زارعك دهب
بتأكلينى سباخ
إن كان دة تقل ودلع
بزيادة دلعك باخ
لا شفت فيكى هنا
ولا شفت فيكى ترف
كل اللى فيكى قرف

كرامتنا متهانة
واللقمة بإهانة
بتخلفينا ليه لما انتى كارهانا

يعنى ايه تبقى إنتى هبة النيل يا مزة
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع

لما قش الرز ثروة بتتحرق
وأما نفط الأمة ثروة بتتسرق
وأما جلادك على ولادك بيبطش
وأما علمك ما يلاقيش يآكل فيطفش

يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس أربع سنين حبس احتياطى

يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته

أنا عمرى ما أتأمرت
ولا حطيت شروطى
ومكان ما ترسى مركبك
بابنى شطوطى
أنا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى أرضك اتمرمغت فيه
وكل يوم عشتيه
أنا اتغذبت بيه

علا صوت أدانك جرس
فى الشدة صاحينلك
من امتى كانوا الحرس
هما اللى باقينلك

بعتينى علشانهم
وعنيكى معصوبة
ياهلترى خاينة
ولا زيى مغصوبة

علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام

مستنى ايه من طفل ربوه بالزعاق
غير المشاكل والخناق
كل اللى بيقولك بحبك دول نفاق
أنا لما قلت لك بحبك
كان نفاق

الحب يعنى اتين بيدوا
مش ايد بتبنى وستميت تيت تيت يهدو
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى أعيش علشان هدف
علشان رسالة
يعنى احس بقيمتى فيكى
إنى مش عايش عوالة

يعنى لما اعرق تكافئيى بعدالة
الحب حالة
الحب مش شعر وقوالة

الحب حاجة ما تتوجدش فى وسط ناس
بتجيب غداها من صناديق الزبالة

بارت مراعينا والبئر قد جفَ
والجوع يكوينا والصبر ما كّفى
والقلب لا يهدا والجرح لا يشفى
ولأننا طوع
زنا لهم خفا
جاءوا بموكبهم
واشتغلت الزفة

الدفة مظبوطة
وأصلا مافيش دفة
والكفة مش مايلة
علشان مافيش كفة

و جحا اللى جاى بالليل لساه بيتخفى
شايف ديدان الغيط سارحة ومارحماشى
من جبنه شاف الدود سابه وراح ماشى
ولا اتكسف للناس
ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى … ماشى

الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك

احنا اهلك
احنا رجالتك
أمانك
إحنا وقت الشدة سندك
إحنا زادك

يا جحا احمى ولادك
لو كنت عايز تحمى طينك
سوف أرحل
ربما يلقانى من ارجو لقاه
هامشى ويا الشحاتين

وابكى على حلمى اللى تاه
بس مش هاشحت رغيف
هاشحت وطن لله

فعلا مصر جميله اوى
فيها نهر وبحرين و3 اهرامات

شارك
شارك رابط مختصر:

    9 تعليق علي “قصيدة مدح في مصر جميله اوى

    • 17 ديسمبر، 2010 at 3:08 م
      Permalink

      والله العيب مش في مصر
      مصر مالهاش زنب
      ولا لينا حق نقول مابنحبهاش
      العيب فينا وفي الناس
      اللي فيها

      مالها مصر
      فيها ايه يتكره
      غير الناس والمعامله اللي مالهاش اي داعي
      بلاش نحط الذنب والوم عليها

      Reply
    • 9 أكتوبر، 2010 at 1:35 ص
      Permalink

      لو هنحكي مش هنلحق نقول كل اللي
      عايزينه

      تسلم ايديك

      شكرا لمرورك يا قمر

      Reply
    • 8 أكتوبر، 2010 at 3:22 م
      Permalink

      لو هنحكي مش هنلحق نقول كل اللي
      عايزينه

      تسلم ايديك

      Reply
    • 8 أكتوبر، 2010 at 3:08 م
      Permalink

      الكلام حلو اوى ومعبر ويتحس
      حاولت اخد اكتر مقطع حسيته لاقيتنى هاخد القصيده كلها

      تسلم ايدك

      شكرا على المرور يا جميل

      Reply
    • 8 أكتوبر، 2010 at 3:03 م
      Permalink

      الكلام حلو اوى ومعبر ويتحس
      حاولت اخد اكتر مقطع حسيته لاقيتنى هاخد القصيده كلها

      تسلم ايدك

      Reply
    • 8 أكتوبر، 2010 at 2:27 م
      Permalink

      جااااااااااااامد

      Reply
    • 8 أكتوبر، 2010 at 2:19 م
      Permalink

      ودا فيديو للقصيده من برنامج العاشره مساء
      [ame=”http://www.youtube.com/watch?v=5jz2dETWRY8″>http://www.youtube.com/watch?v=5jz2dETWRY8[/ame>

      Reply
    • 8 أكتوبر، 2010 at 2:12 م
      Permalink

      لما قريتها كلها
      وعيشت اساها ووجع اهلها
      حسيت
      في كل كلمة كتبتها بينت ازاي عايشين
      وفي كل صرخة الم صحت وجع السنين

      تعرف يا صاحبي لما اتوجعت كان من ايه
      لما شوفت كتابتك

      فعلا مصر جميله اوى
      فيها نهر وبحرين و3 اهرامات

      اااااااااه يا زمن

      مبقاش فى حاجه واحده تخلينى احبها

      وحكايه نهر وبحرين و3 اهرامات دى انا قولتها لان دى مرتبطة علطول بجمال مصر يعنى اى حد ةبيكتب موضوع عن مصر تلاقيه حاطط صوره ليهم

      وكان مصر هى نهر وبحرين و 3 اهرمات بس
      وشكرا على مرورك يا ستارز

      Reply
    • 8 أكتوبر، 2010 at 9:45 ص
      Permalink

      لما قريتها كلها
      وعيشت اساها ووجع اهلها
      حسيت
      في كل كلمة كتبتها بينت ازاي عايشين
      وفي كل صرخة الم صحت وجع السنين

      تعرف يا صاحبي لما اتوجعت كان من ايه
      لما شوفت كتابتك

      فعلا مصر جميله اوى
      فيها نهر وبحرين و3 اهرامات

      اااااااااه يا زمن

      Reply

    اترك تعليقاً

    لن يتم نشر عنوان بريدك الإلكتروني.